Collaboraziun denter la USDT ed il CB Trun/Rabius

12-06-20

Cun la nova sesiun da ballapei 2020/2021 collaboreschan ils clubs da ballapei dalla US Danis-Tavanasa ed il CB Trun/Rabius. Per las equipas activas en 3. tochen 5. ligia ei vegniu fundau ina gruppaziun.  

Suenter liungas contractivas ein ils dus clubs da ballapei dalla Surselva secunvegni da fundar ina gruppaziun sin basa dallas equipas activas. Omisdus clubs ein stai fetg interessai da saver collaborar denter ils rivals d'antruras. Sin quella moda vegnan omisdus clubs a saver rinforzar lur empremas equipas, il CB Trun/Rabius l'equipa che gioga en 3. ligia e la USDT l'equipa che gioga en 4. ligia.

Nossa equipa dalla 4. ligia vegn aschia rinforzada entras giugadurs dil CB Trun/Rabius, nos ferms giugadurs han aschia la pusseivladad da saver dar cul CBTR en 3. ligia. In gudogn per omisduas equipas. En 5. ligia ei il diember dils giugadurs aunc constant aults, aschia ch'ei dat leu pil mument negin brat da giugadurs.

Muort la demissiun dil trenader actual da nossa emprema equipa, Sandro Cathomas, eisi stau dad ir alla tscherca dad in niev trenader. En las atgnas retschas eisi buca stau pusseivel d'anflar in successur per Sandro. Cun grond cletg e per nossa cumpleina cuntentientscha ei lu Renzo Albin, anteriur giugadur dil CB Trun/Rabius sedecleraus promts da surprender nossa emprema equipa.

Nus essan fetg leds da sia promtadad da sustener noss'uniun e sperein ch'el sesenti bein era en nossas retschas e sin nies plaz da ballapei a Mutteins. Cordialmein fagein nus in beinvegni al niev trenader Renzo e giavischein bien success culs giugadurs dalla 4. ligia.

Sut quei link arriveis sin las intervestas da divers protagonists dils dus Clubs, fatgas da RTR.