Vuls Ti daventar nies sponsur?

In'uniun sco il club da ballapei US Danis-Tavanasa investescha bia daners en infrastructura e promoziun da juniors. Tuts funcziunaris e trenaders engaschai impundan massa temps liber per ina mediocra indemnisaziun. Cun quellas investiziuns ei in futur flurond garantius e la lavur sociala dall'uniun sin fermas combas.

Las cundiziuns per menar in'uniun vegnan adina pli severas e stentusas. Ed aschia creschan era las expensas dils clubs en nossa regiun. Gia dapi massa onns sustegnan numerus sponsurs e donaturs generusamein nossa USDT e quei senza ina cunterprestaziun gronda. Senza sponsurs e donaturs sa negina uniun exister a liunga vesta. Nus duvrein mintgin da vus e nus essan leds e loschs da mintgin da vus che s'engascheis per nies futur, per nossa giuventetgna!

Ha Tia fatschenta forsa interess e gust da segidar cun noss'uniun? Legia vinavon e speronza anflas ina pusseivladad da sustener nossa uniun. Bugen astgas Ti s'annunziar directamein tier il menader da marketing sut marketing@usdt.chGia ordavon engraziein nus cordialmein pigl interess e naturalmein per in eventual sustegn finanzial.


SPONSUR PRINCIPAL

En sesez ha il sponsur principal il pli bi! El sa numnadamein sepresentar sin las pli differentas plattafuormas che noss'uniun porscha e dapertut vegn fatg reclama cun siu logo da fatschenta.

Cun ina generusa investiziun vegn era Tia fatschenta en la cuida da quei survetsch extraordinari e nus procurein che tut vesi Tiu logo.


PARTENARI

Tgi che vul denton buc esser il pli sissum la gliesta dils sponsurs sa daventar nies partenari, cun bunamein la medem gronda purschida. Ei dat certas differenzas visavi il sponsur principal, denton era quella purschida ei fetg attractiva per fatschentas.

Optimal eisi naturalmein, sche l'uniun ed il partenari san nezegiar certas sinergias in da l'auter, aschia che omiduas partidas gudognan la finfinala.


SPONSUR DA MONDURAS

Mintga equipa activa e da juniors porta silmeins in sponsur sin siu tricot. Il logo dil sponsur ei duront 90 minutas ella vesta dils aspectaturs. Inaga pli spert, inaga pli plaun semuentan ils giugadurs sil plaz e cun in tec cletg settan els schizun in gol, e quei adina en nies focus.

Plazzei il logo sils tricots dils giugadurs e stei vid il bal.


SPONSUR TABLA DA RESULTATS

Con ditg cuozza il giug aunc? Cons gols ein gia vegni sittai?

In sguard sill'ura da giug ei adina puspei necessaris- per aspectaturs sco era pils giugadurs. Cun Tia reclama sill'ura ei Tiu logo plazzas fetg bein e resta stedi ell'egliada dils presents sil plaz da ballapei.

Contas ga vegn mirau sin quella tabla da giug? Tgisà!


TABLA DA RECLAMA VID LOCAL

Nies local dil club a Mutteins sper il plaz da ballapei ei vegnius erregius igl onn 2009 e porscha ina ideala surfatscha per Tia reclama. Il baghetg ei il punct da serimnada per aspectaturs, giugadurs e fans.

La tabla da reclama ei amiez in punct central ed ei in tgeu aspectatur duront las discussiuns animadas e bialas fiastas da ballapei.


TABLA DA RECLAMA VID LA SEIV

Penda Tia reclama vid la seiv da ghitter entuorn il plaz da ballapei. Ina buna presenza duront 90 minutas che enzuglia giugadurs ed aspectaturs en ina immensa tensiun.


SPONSUR DA PRESTAZIUNS

L'US Danis-Tavanasa ei adina puspei visada vi sin survetschs e prestaziuns per mantener ils plazs da ballapei e sia infrastructura. Damai che las finanzas tonscha buc adina da selubir tut ils cuosts, savess il sponsur era sepresentar gratuitamein cun ina tabla da reclama vid la seiv ni vid il local dil club a Mutteins.

Ei era ina attractiva varianta da presentar ina fatschenta e sia lavur bein prestada en favur dil club da ballapei.


SPONSUR CARTA DA SESIUN

La carta da sesiun ei in pign medium, denton da grond'impurtonza, per l'uniun mo era per il sponsur dalla carta.

La carta da sesiun lubescha da persequitar gratuitamein tut ils giugs da ballapei a Mutteins. La buorsa sto vegnir enta maun sulet per in migiel da beiber ni per pagar ina buna ligiongia dil gril.

NIEV! Naven dalla sesiun 2020/2021 san era ils giugs da ballapei sil plaz da bal Pustget a Trun vegnir persequitai gratuitamein. Mintga sponsur retscheiva la carta gratuitamein.