Historia e cronica
L'Uniun sportiva Danis-Tavanasa ei vegnida fundada ils 02 da matg 1942. Gia massa onns avon ha l'historia dil club entschiet. Cheusuenter saveis leger entgins texts dad impurtontas persunas dall'uniun. Quels texts e biaras autras historias e fotografias ein era francadas en nies cudischet da giubileum "75 onns USDT - Dapli ch'in club da ballapei".
Il cudisch da giubileum san ins era empustar directamein sur marketing(at)usdt.ch. El cuosta frs. 10.- senza cuosts da distribuziun. Engraziel fetg per l'empustaziun.
Uss giavischein buna lectura!
1942 - 1968; da Balzer Derungs
...Igl onn 1926 sundel returnaus da Genevra a Danis, en mia valischa in bal da curom. Quei ei stau gl’emprem bal a Danis -Tavanasa. Era in reglament da giug haiel purtau da Genevra. Suenter empau teoria ed entginas munglusas demonstra- ziuns praticas a mes camerats, ha l’emprema lutga da ballapei giu liug al Plaun Danis. Malgrad ils calzers enguttai e per part ornai cun rabaizas, ha il combat cuzzau bien 2 uras. Dapi quei di ei la balla a pei mai pli svanida da nies vitget. Ina activitad regulada era denton buca stada pusseivla, muort la munconza d’in plaz adattau. Finalmein, el decuors digl unviern 1941/42 ein in bien tozzel giuvens seradunai per fundar ina uniun da sport! Ins ei semess cun grond slontsch alla lavur. En emprema lingia ha ei giu num anflar in terren adattau pil plaz da bal. El «Fop» enta Dautras ha la ludeivla vischnaunca da Breil lu concediu il terren giavischau. Ussa ha ei giu num da dustar bia ogna, caglias e crappa. A mintga commember ei vegniu adossau in pensum da 60 uras lavur gratuita. En ca. 3 meins era il terren ulivaus e semnaus.
Per buca restar inactivs igl unviern vein nus decidiu da fun- dar ina secziun de skiunzs ed in novum per da gliez temps era da recepir skiunzas en nossa uniun! E gia 1942/43 dumbrava nossa uniun ca. 40 commembers e commembras.
In grond di da fiasta ha giu liug la stad 1943: La avertura ufficiala dalla plazza sportiva «Fop» enta Dautras. Per quella caschun vein mess en competiziun il buccal ambulont «Fop». Nos vischins da Mustér, Rabius e Trun2 han priu part e nus havein giu la satisfacziun da daventar ils emprems victurs dil bi buccal! En surpli havein nus priu part igl onn 1945 per l’emprema ga al campiunadi en 4. ligia e quei cun variont success! Igl ei denton mai reussiu a nus da senumnar campiuns da gruppa els emprems 20 onns d’existenza.
Equipa da fundaziun
Cuorsa da skis dalla USDT
1959 - 1967; da Romano Caduff
Nossa plazza da ballapei «Fop» ha stuiu ceder agl implont electric Dautras. Per ina indemnisaziun adequata ei la uniun USDT promta d’ereger ord atgnas forzas ina nova plazza. Igl areal «Isletta» para da satisfar allas premissas necessarias. La dislocaziun dil stan da tir e la cumpra da terren privat retardan la realisaziun. El decuors dalla stad 1961 sa impressari August Beer finalmein metter en moviment l’execuziun. In onn suenter suonda l’inauguraziun, e quei en collaboraziun cullas squadras hospitontas da Trun1 e Schluein. A quella caschun astga Balzer Derungs retscheiver ord ils mauns dil president Romano Caduff la menziun d’honur. Leu nua che la sgarscheivla bova dils anno 1927 veva caschunau destrucziun anfla giuven e vegl il passatemps cunvegnent.
E tgei ei marschau sil camp sportiv?
Buna entelgientscha e spért da concordanza han regiu dalla bial’entschatta e valan aunc oz per maxima. Alla finiziun dil campiunadi 61/62 figurescha nossa equipa gia alla testa da classificaziun ex-aequo cun Glion, e sulettamein la prolungaziun dalla «biala» dat la preferenza agl adversari.
Igl onn 1963 porta reha raccolta da trofeas:
Per l’emprema gada secloma il victur dil cup Grischun Danis-Tavanasa, ed era il cup Viamala a Tusaun croda quei onn en nies possess. L’invasiun da buccals pren buca fin, sco sche nossa vitrina vess l’influenza d’in magnet. Aschia vein era gudignau il Cup Cynar e 65 e 66 il cup da Trun.
Il campiunadi 66/67 ha gest priu sia fin:
En 12 lutgas ha nossa valerusa squadra recaltgau 22 puncts (lu aunc 2 puncts per victoria) senza spiarder in sulet giug, senza dubi ina bravura digna dil 25 avel anniversari da noss’ uniun!
In'equipa all'entschatta dalla USDT - el Fop
Equipa digl onn 1963
1968 - 1978; da Pieder Caduff
Nus essan egl onn 1978, pia in bien decenni pli tard, e danovamein stat Danis-Tavanasa avon l’avertura d’ina nova plazza sportiva, e quei negliu auter che o Mutteins. Il fil da quella revista denton prendel si da Romano Caduff. Pia alla fin dalla sesiun 1966/67 era l’aria en 4. ligia buca pli fina avunda. Ins ha giu queidas dad ir pli ad ault. E quei ei lu era gartegiau els giugs da promoziun encunter Vazsut e Poschiavo, pia per l’emprema ga en 3. ligia. Denton - ils emprems 3 onns sil plantschiu su ein stai plitost mediochers - alla cua.
In grond ed impurtont pass ei schabegiau sil sectur da juniors. Igl ei vegniu instradau in campiunadi da juniors en Surselva. 1971 sesanfla nossa emprema squadra danovamein en 4. ligia. Denton ha l’equipa era en quels onns recaltgau arbagias, e quei adina puspei als turniers che vevan da gliez temps ina gronda muntada. Aschia per exempel ha Danis-Tavanasa gudignau il turnier dalla fabrica da ponn Trun els onns 1971, 1972 e 1973!
1974/75 betta il ballapei a Danis-Tavanasa puspei grondas undas. L’emprema acquista il tetel da campiun da gruppa en 4.ligia ed era ils giugs da promoziun encunter Brusio (vein gudignau a Puschlav 3:1 ed enta Trun 5:0) vegnan decidi fetg claramein en nossa favur. Il desiderau retuorn an 3. ligia munta in bi success per la USDT cul trenader Gabi Derungs. (Daco vein giu dau quei giug da promoziun enta Trun e buca a Tavanasa? Nus vevan udiu che Brusio vegli far protest encunter nos gols giu l’Isletta che seigien memia bass! Per evitar il prighel da spiarder forfait vein dau il giug enta Trun!). E buca mo quei, in ulteriur grond success per nossa squadra da juniors. Suenter ina lutga sportiva giu Sogn Gagl denter ils victurs da classa dallas differentas gruppas dalla Svizra orientala retuornan nos giuvens a casa sco campiun dalla Svizra orientala. Tgei onn da success per la USDT – quei onn 1975!
Ed il medem onn, ils 3 da matg 1975, croda ina ulteriura decisiun: La radunonza generala pren il conclus da baghegiar ina nova plazza sportiva, e quei o Mutteins! E stai nuot auter, l’emprema fa buna pareta en 3. ligia. 1975/76 in bi 3. plaz e 1976/77 il 4. rang. E quei onn vein fatg furora el Cup Svizzer, vein denter auter battiu Balzers (2. ligia) cun 6:3 e lu in giug nunemblideivel encunter Uzwil (1. ligia ), nua che nus vein stuiu suttacumber pér ella prolungaziun e cun bia discletg cun 4: 5.
Era nos juniors han puspei tarlischau e gudignau sco gl’onn vargau il buccal ambulont dil cup Sursilvan. Senza stravagar astga il decenni gest passau vegnir taxaus sco immens fritgeivels, e quei pli u meins sin tuts secturs, sill’entira lingia. Stat la buna cameradaria (dalla quala beinenqual’uniun ei schalusa) e viva il stupent spért d’uniun e la voluntad d’esser enzatgi e vegnir vinavon, lu astga era in bien avegnir esser garantius.
Nos juniors campiuns igl onn 1971
La squadra dalla promoziun en 3. ligia egl onn 1975
1979 - 1992; da Richard Caduff
L’uniun giubilara (1992) ei aunc suenter 50 onns sauna e frestga. Cun plascher constatein nus che nossa emprema ha oz il num d’ina buna equipa en 3. ligia. Ils rangs dalla tabella contonschi ils davos 15 onns pil pli denter ils emprems 5 ord ina gruppa da mintgamai 10 equipas. Ils onns 1984 e 1985 eis ei reussiu da sequalificar pil final dil cup Grischun. Quellas lutgas vein mintgamai spiars encunter l’equipa dalla 1. ligia Cuera1. Sil sectur da juniors ha ei dau ils davos onns grondas midadas. Per l’emprema gada ei nies club separticipaus la sesiun 1991/ 92 cun treis squadras da juniors (A, B, D) al campiunadi ufficial digl OFV.
Menziun speciala meretan quess era ils giugadurs da nies club che han bandunau nus per far carriera en ligias pli aultas. Denter plirs che han giugau naven dalla 2. ligia entochen ella ligia naziunala A less jeu menziunar quels dus ch’ein segir ils pli enconuschents da nies club:
Damian Caduff ha bandunau l’Uniun sportiva Danis-Tavanasa e giugau tier plirs clubs en la ligia naziunala A e B. Ils davos onns ha’l giu grond success sco trenader e quei naven dalla secunda ligia entochen la ligia naziunala B.
1978 ha Pauli Friberg bandunau nies club e giugau plirs onns en la ligia naziunala A e B. Sco punct culminont ei da valetar il tetel da campiun Svizzer ch’el ha acquistau cul club da ballapei da Lucerna.
In novum singular en la Surselva ei era igl auto da posta blau-alvs da nies club. Grazia a nies trenader dall’emprema Pino, sco sponsur, stat igl auto da posta vegl ch’ei carraus biars onns la via Tavanasa-Breil a disposiziun a nies club sco vehichel da transport per l’emprema – denton mintgaton era per las ulteriuras squadras.
La primavera 1992 havein nus era saviu prender en funcziun nies kiosk o Mutteins. Denton era sin nossa plazza da trenament Isletta havein nus fatg remeduras – humusau il plaz ed eregiu ina nova seiv, per che buc memia biars bals daventien l’unfrenda dil Rein. Uonn sentaupan per l’emprema gada tut las generaziuns da noss’uniun per schar reviver regurdientschas – forsa daditg emlidadas. In treidubel «Viva» sils 50 dall’Uniun sportiva Danis-Tavanasa e bien cletg e prosperar vinavon.
La squadra digl onn 1980
La squadra digl onn 1990
1992 - 2017; da Gabi Derungs
Il pli impurtont che nus astgein constatar oz, egl onn da nies giubileum:
Nossa USDT ei ina uniun che viva, nua ch’ei vegn aunc adina dau bal cun tgierp ed olma, nua ch’ei vegn luvrau pil manteniment dalla uniun, nua ch’il spért da uniun ha anflau sia cuntinuaziun, nua che idealists s’engaschan cun perschuasiun e van ordavon cul bien exempel, sperond ch’els anflien buns vegnentsuenter che capeschan da promover vinavon quella uniun ch’ha dapi 75 onns ina gronda muntada per vitg, vischnaunca e vitgs vischinonts, ed oravontut era per nos giuvenils e nos affons.
Igl ei buca sempel da mantener quei ault nivel da nossa uniun. Ozildi han ils giuvenils aunc biaras pusseivladads che nus vevan buca pli baul, e s’engaschar per la USDT munta savens, spel plascher da dar bal da cuminonza, era da pres- tar lavur, da purtar beinenqual sacrifeci, da desister magari d’auters gudiments, mo jeu sun perschuadius che igl engaschi per nossa uniun porta al singul biars bials muments en buna cumpignia e che las stentas en favur dalla USDT sepagan, buca finanzialmein, mobein moralmein: Ins sa parter il plascher dallas victorias, ins sa parter il «Frust» dallas sperdidas, ins fuorma ina unitad che sustegn in l’auter, ins sesenta buca persuls, ins metta finamiras era per il temps liber. Quei dat forza, al singul sco era alla gruppa.
Noss'emprema equipa igl onn 2017